Scott Pilgrim 2 i nGaeilge

Fear óg leibideach ite ag an leisce é Scott Pilgrim. Tá cónaí air in Toronto agus tá sé ag siúl amach le Knives, cailín atá fós ar an meánscoil. Seinneann sé an dordghiotár i mbanna lena chairde. Tagann bean faoi leith i láthair ina chuid bhrionglóidí ach níl a fhios aige cé hí.

Go tobann, castar ar a chéile iad ag cóisir agus bíonn sé splanctha ina diaidh. Is í Ramona Flowers an bhean dhiamhrach sin. Is as Nua-Eabhrac di agus caithfidh Scott a sheacht ndícheall a dhéanamh chun í a mhealladh chun gur féidir leo siúl amach le chéile. Chuige sin, ní mór dó an caidreamh le Knives a chur ar ceal. Ach tá dream rúnda ann, na leannáin eile a shiúl amach le Ramona san am a chuaigh thart, in éad le Scott agus tá sé mar rún acu an caidreamh nua a chur ó mhaith.

An dtuigeann Scott céard atá ag tarlú? An bhfuil sé in ann na leannáin éadmhara sin a threascairt chun gur féidir leis féin agus Ramona siúl amach le chéile? Sa scéal spleodrach scléipiúil seo, cuirtear Scott Pilgrim agus a chairde in aithne don léitheoir agus feictear conas mar a éiríonn le Scott an bhean is ansa leis a bhuachan maille leis na heachtraí a thiteann amach chun a chinntiú gur féidir leis siúl amach léi.

Sraith trí leabhar é Scott Pilgrim.Tá 1,212 leathanach sa tsraith ar fad.